ردا علي قصيدة الشاعر الكبير
احمد فؤاد نجم …حين قال :
أحبك محشش مفرفش مطنش
و دايخ مدروخ و آخر إنسطال
أحبك مكبر دماغك مخدر
ممشي أمورك كده بإتكال
وأحب اللي ينصب و أحب اللي يكذب
وأحب اللي ينهب و يسرق تلال
وأحب اللي شايف وعارف تمامه
وبالع لسانه و كاتم مقال
وأحب اللي راضي وأحب اللي فاضي
وأحب اللي عايز يربي العيال
وأحب اللي يائس و أحب اللي بائس
وأحب اللي محبط وشايف محال
واحبك تسافر وتبعد تهاجر
وتبعت فلوسك دولار أو ريال
واحبك تطبل تهلل تهبل
عشان ماتش كوره وفيلم ومقال
واحبك تأيد تعضد تمجد
توافق تنافق وتلحس نعال
تحضر لشادر تجمع كوادر
تلمع تقمع تضبط مجال
لكن لو تفكر تخطط تقرر
تشغلي مخك وتفتح جدال
وتبدأ تشاكل وتعمل مشاكل
وتنكش مسائل وتسأل سؤال
و عايز تنور و عايز تطور
وتعمللي روحك مفرد رجال
ساعتها هجيبك لا يمكن أسيبك
وراح تبقى عبرة وتصبح مثال
هبهدل جنابك واذل اللي جابك
وهيكون عذابك ده فوق الاحتمال
وامرمط سعادتك واهزأ سيادتك
واخلي كرامتك في حالة هزال
وتلبس قضية وتصبح رزية
وباقي حياتك تعيش في انعزال
أحمدفؤادنجم
….(( لا أحبك محشش ))…
لا أحبك محشش مسطول
مفرفش و دماغك عال
و مكبر دماغك و في وقت
فراغك ما فيه انشغال
و تكذب و تنصب و تهلل
لما تنهب و تسرقها تلال
و لا امورك بتمشي لما تقبل
ترشي و متفكرشي في الحلال
لو هيا هتمشي لو لغيرك هترشي
بلاها إياكشي …. تهد الجبال
و لا ألاقيك فاضي قصادي
و بعيشتك راضي و لا تفتح مجال
و مع المعسل تكسل
ولا تقدر تحصل رزق العيال
وعايش تهلس و ديما مفلس
و علي غيرك تغلس بذل السؤال
ولا تعيش يائس و بأئس
و بس ناقص تعلنها انعزال
ولا تهين نفسك و لا تعيش
في بؤسك دول أسوأ خصال
فكر تسافر تبعد تهاجر
و ابعت فلوسك دولار أو ريال
و لا تقبل تهبل أو مرة تطبل
لماتش كورة و يطول الجدال
و في الحق وارد ممكن تعارض
ولا توافق تنافق و تلحس نعال
ولا تبلع لسانك مدام مخلص
و صانك من رموز الضلال
و ارضي بنصيبك و لا رزقك
يسيبك ولو في نظرك محال
واخلص في عملك وحب بلدك
و ربي ولدك باللقمة الحلال
★★★★★★★★★★★
د/عمر عبد الجواد عبد العزيز
الجامعة العربية الدولية للثقافة والسلام فرنسا 